Мінгарсуд адмяніў штраф Вячаславу Сіўчыку і зноў накіраваў справу ў Цэнтральны суд (відэа)

3 лістапада прайшло паседжанне Мінскага гарадскога суда па скарзе Сіўчыка на незаконнае рашэнне суда Цэнтральнага раёна ад 9 кастрычніка. Прысуд грунтаваўся на трох пратаколах, складзенных міліцыянтамі па ягоных выступах на плошчы Свабоды, паведамляе belprauda.org.

“Два пратаколы былі, як у іншых выступоўцаў, а трэці быў унікальны – па Пуціну В.В. (вось за каго турбуецца беларуская міліцыя). Быў вынесены штраф у памеры 10 млн. 800 тыс.руб. – за выступы і за абразу Пуціна. У маёй скарзе падрабязна было распісана, чаму рашэнне суда Цэнтральнага раёна незаконнае і патрабавалася адмена гэтага незаконага рашэння і спыненне справы”, – паведаміў Вячаслаў Сіўчык.

Мінскі гарадскі суд рашэнне адмяніў…  і накіраваў зноўку справу ў суд Цэнтральнага раёна.

9 кастрычніка  суд Цэнтральнага раёна Мінска асудзіў арганізатараў мітынга “Не расійскім вайсковым базам” супраць размяшчэння расійскай авіябазы, які  прайшоў 4 кастрычніка на плошчы Свабоды. Агулам суд аштрафаваў арганізатараў на 53 мільёны рублёў.