Прафсаюз РЭП просіць Лукашэнку адмяніць кантрактную сістэму

“Гэты крок будзе справядлівым у адносінах да выбаршчыкаў, дазволіць матываваць высокавытворчую працу і значна аздаравіць мікраклімат на прадпрыемствах і ў калектывах”, - напісалі аўтары звароту.

Лідар прафсаюза РЭП Генадзь Фядыніч дадае, што сённяшняя сітуацыя з кантрактнай сістэмай “на руку” толькі ўладзе.

-  Кантрактная сістэма ў краіне дзейнічае не так, як патрэбна. Дэкрэт №29 з’явіўся на свет у далёкім 1999 годзе, калі востра паўстала пытанне, як стрымліваць высокакваліфікаваных спецыялістаў на прадпрыемствах і ў арганізацыях. І тады прымяненне гэтага дакумента дало магчымасць пераводзіць работнікаў на кантракты з істотным павелічэннем заробку. І ў той жа час кадры ўдалося захаваць на многіх прадпрыемствах, - заявищ Генадзь Фядыніч у інтэрв’ю "Радыё Рацыя". -  А што адбываецца зараз? На кантракты перавялі ўсіх! Пры гэтым з многімі працоўныя пагадненні заключаюцца на зусім кароткі тэрмін — на год. Атрымліваецца, што чалавек кожны год павінен жыць у страху, што яго могуць зволіць ці не працягнуць кантракт.

Прафсаюз РЭП прапанаваў кіраўнітцву краіны, каб усе надбаўкі і выплаты, якія прадугледжаны кантрактам, былі пераведзены ў тарыфы і аклады.