У памяць аб забітых да будынку КДБ у Мінску прыйшлі 150 чалавек

Мэтай акцыi было нагадаць пра злачынствы сталiнiзму супраць беларускага народа i засцерагчы ад новых злачынстваў сучасных пераемнiкаў катаў з НКУС.

Людзі сталі ланцугом уздоўж праспекта і паставілі дзясяткі свечак на прыступках параднага ўваходу ў будынак. 

Акцыю арганізоўваў палітык Мікола Статкевіч. На яе сабраліся каля 150 чалавек са свечкамі. Акцыя прайшла без затрыманняў, але міліцыя склала пратаколы на яе арганізатараў, паведамляе "Наша Ніва".

Удзельнікі акцыі віталі воплескамі машыны, што сігналілі ім на знак салідарнасці.

29 і 30 кастрычніка 1937 года адбылася кульмінацыя масавых расстрэлаў беларускіх элітаў. Савецкі рэжым знішчыў больш за 90% вышэйшых чыноўнікаў і інтэлігенцыі. Гэта была прадуманая палітыка, аналагічная той, якую праводзілі на акупаваных тэрыторыях нацысты. Яе мэтай было пазбавіць паднявольныя народы ўласных эліт — тых груп, якія былі б здольныя ўзначальваць грамадства.

Апроч акцыі "Ланцуг памяці" 29 кастрычніка грамадскія актывісты наведалі месцы расстрэлаў у Мінску і рэгіёнах, а таксама ўшанавалі памяць ахвяр таталітарызму ў Курапатах.