Чыноўнікі перадумалі ўшчыльняць Каменную Горку ў Мінску

Пытанне аб дадатковым размяшчэнні 11 тысяч жыхароў у Каменнай Горцы не актуальнае - горад ад такога сцэнару адмовіўся, паведамляе charter97.org.

Пра гэта паведаміў сёння старшыня камітэта архітэктуры і горадабудаўніцтва Мінгарвыканкама Павел Лучыновіч.

Нагадаем, аб магчымым ушчыльненні аднаго з самых густанаселеных раёнаў Мінска стала вядома блізу двух тыдняў таму. На грамадскае абмеркаванне быў вынесены праект, у адпаведнасці з якім насельніцтва раёна да 2020 года павінна павялічыцца з 57,7 тысяч да 68,7 тысяч чалавек. Будаваць новыя дамы прапаноўвалася на пустцы ў раёне перасячэння вуліц Калеснікава і Люцынскай. Паводле першапачатковага праекту гэты ўчастак павінен быў стаць зялёнай зонай.

"Тэма зялёных зон актуальная. Нам неабходна захоўваць існую водную сістэму і развіваць зялёныя тэрыторыі, якія зарэзерваваныя генеральным планам. Гаворка ідзе пра другое левае паўкола Лошыца - рака Мышка, бо там знаходзяцца найбуйнейшыя жылыя раёны горада - Каменная Горка, Сухарава, Кунцаўшчына, Паўднёвы Захад, Малінаўка. Гэта важная праблема, азелянення на гэтых тэрыторыях не хапае", - заявіў Павел Лучыновіч.