Міліцыя не знайшла вінаватых у апаганьванні помніка Міхаілу Жызнеўскаму

Маці забітага Ніна Васільеўна лічыць, што міліцыя прыехала толькі таму, што помнік быў застрахаваны:

– Калі б помнік не быў застрахаваны, яны б увогуле нават не прыехалі і нічога б не сказалі і ўсё. Міліцыя кажа, што гэта падлеткі зрабілі. Падлеткам гэта не трэба, яны цяпер нават такіх слоў не ведаюць – здраднік. Вы і самі цудоўна ведаеце, што яны сядзяць усе ў інтэрнэце на сваіх сайтах, на сваіх чатах, ім не да могілак, каб там бегаць і гэта ўсё рабіць, - сказала яна «Радыё Рацыя».

Міхаіл Жызнеўскі быў адным з першых актывістаў, якія загінулі падчас Рэвалюцыі годнасці ў Кіеве ў пачатку 2014 года. Помнік на магіле героя Нябеснай сотні ў выглядзе разгорнутай кнігі ўсталявалі пры дапамозе ўкраінскіх і беларускіх валанцёраў. Помнік будзе адрэстаўраваны за кошт страхавой кампаніі.