Шэсце на Дзяды пройдзе 1 лістапада

Намеснік старшыні партыі Юрась Беленькі сказаў "Радыё Свабода", што паводле заканадаўства да таго моманту, як дадзены дазвол, не можа абвяшчацца месца збору і маршрут шэсця.

«Акцыя будзе 1 лістапада і пройдзе ў традыцыйным фармаце», - сказаў Юрась Беленькі і дадаў, што яго запрасілі ў Мінгарвыканкам 26 кастрычніка - меркавана, каб агучыць рашэнне што да дазволу акцыі.

Летась Юрасю Беленькаму прысудзілі тры штрафы за шэсце па горадзе і мітынг у Курапатах, а таксама за акцыю «Дзяды» ў Лошыцы. Фармальна яго судзілі за парушэнне закону аб масавых мерапрыемствах. Паводле абвінаваўцаў, КХП-БНФ не заключыла дамову аб забеспячэньні парадку падчас шэсця і не аплаціла адпаведныя паслугі міліцыі і медычнай службы.

Дзяды - гэта восеньскія дні памінання продкаў. У гэты час у большасці рэгіёнаў Беларусі людзі прыходзяць на могілкі, каб прыбрацца і памянуць дзядоў, бацькоў, добрых людзей. Шмат дзе застаўся старадаўні чын супольнага абеду на магіле. У іншых месцах людзі проста прыносяць трохі ежы на магілы.

У Мінску ж у гэты дзень традыцыйна адбываецца велічная маніфестацыя з крыжамі і бел-чырвона-белымі сцягамі да Курапатаў - месца расстрэлу ахвяраў сталінскіх рэпрэсій. Ад 1991 да 1996 года гэтае свята было дзяржаўным, прызначаным на 2 лістапада.