Яшчэ адзін кадэт упрыгожыў сябе гербам "Пагоня", каб падтрымаць хлопцаў з Ястрамбельскай школы

Хлопец падтрымаў навучэнцаў Ястрамбельскай школы-інтэрнату, якім пагражала адлічэнне за майкі з "Пагоняй". 

У сваім "Інстаграме" ён паставіў тэгі #пагоняпобач, #прывітаннезбрэста, #язабеларусь, #кадэт, паведамляе charter97.org.

Кадэт таксама напісаў "Прывітанне Баранавічам з Брэста".

Нагадаем, скандал разгарэўся 16 кастрычніка, калі ў інтэрнэце з'явілася фота чатырох кадэтаў Ястрамбельскай школы-інтэрнату пад Баранавічамі, якія дэманстравалі майкі з "Пагоняй" пад форменным адзеннем.

Здымак размясцілі ў супольнасці "Мая краіна Беларусь" у сацсетцы "Вконтакте". Аўтар падпісаў фатаграфію: "Прывітанне з Баранавічаў".

Пазней у сетцы з'явілася інфармацыя аб тым, што адзін з кадэтаў адлічаны, а ў дачыненні да астатніх будуць таксама прынятыя захады. Інтэрнэт-супольнасць выказала салідарнасць з навучэнцамі. На сайце change.org з'явілася петыцыя з патрабаваннем "не дапусціць адлічэння кадэтаў Ястрамбельскай школы-інтэрната".

Акрамя таго некамерцыйная арганізацыя "Арт Сядзіба" пачала ў сацыяльных сетках кампанію #пагоняпобач, удзельнікам якой прапанавалі выкладваць свае фатаграфіі ў майках з "Пагоняй".

Пазней Міністэрства адукацыі Беларусі выступіла з заявай, што кадэты не будуць адлічаныя.