У Беларусі можа быць вынесенае чарговае смяротнае пакаранне

Два наркаманы з Віцебска з асаблівай жортскасцю забілі бейсбольнай бітай двух чалавек.

Пракуратура Віцебскай вобласці накіравала ў суд справу аб падвойным забойстве і прычыненні цяжкіх цялесных пашкоджанняў. Яна была распачата ў дачыненні да двух маладых мужчын 1992 і 1993 года нараджэння, якія ў сакавіку збілі трох сваіх знаёмых, з якіх мужчына 1989 і жанчына 1991 года нараджэння ад атрыманых траўмаў памерлі.

Кампанія сабралася ноччу на кватэры аднаго з абвінавачаных, выпівала, ужывала наркотыкі, паліла кальян. Затым фігуранты да смерці забілі двух чалавек бейсбольнай бітай, трэці атрымаў цяжкія цялесныя пашкоджанні, але выжыў, паведамляе БЕЛТА.

За двайное забойства з асаблівай жорсткасцю з хуліганскіх памкненняў абвінавачаным пагражае смяротнае пакаранне.

Беларусь - -апошняя краіна ў Еўропе і на постсавецкай прасторы, дзе захаваўся такі від пакарання, як смяротнае пакаранне. З 2009 года пачала сваю дзейнасць кампанія, якая называецца "Праваабаронцы супраць смяротнага пакарання ў Беларусі", мэты кампаніі - увядзенне мараторыя на смяротнае пакаранне як першы крок да яго адмены.