Бабруйчанку, у якой адбіраюць дзяцей, выпусцілі з залы суда

Жанчына атрымала год абмежавання волі без накіравання ў папраўчыя ўстановы. Настасся Навоева зможа вярнуцца ў сваю кватэру і хадзіць на працу. Пракурор прасіў два гады абмежавання волі, але тэрмін скарацілі з улікам амністыі.

У красавіку ў жанчыны адбыўся канфлікт з міліцыянерам, апошні, як сцвярджае следства, атрымаў цялесныя пашкоджанні. Інцыдэнт здарыўся ў момант, калі ўрачы ў бальніцы адмовіліся аддаваць Навоевай яе маленькую дачку, хоць афіцыйных дакументаў пра адабранне дзяцей на той момант не было.

“Апынуўшыся на волі, Настасся адразу ж абняла людзей, якія дапамагалі ёй з адвакатамі. Адразу ж яна спыталася пра дзяцей. Першай справай Настасся захацела паехаць у сацыяльны прытулак, дзе зараз знаходзяцца Ульяна і Іван. Усе яе адказы на пытанні пра будучыню тычацца толькі яе дзяцей”, — апавядае Еўрарадыё актывістка грамадзянскай кампаніі “Наш дом” Алеся Садоўская, якая шчыльна займалася праблемай Настассі Навоевай.

20 кастрычніка ў жанчыны адбудзецца чарговы суд па адабранні ў яе дзяцей. Камісія па справах непаўнагадовых і аддзел адукацыі хоча пазбавіць бацькоўскіх правоў і роднага бацьку 7-гадовага Івана і 4-гадовай Ульяны — Генадзя Гарленку. Пры тым, што бацька, таксама як і маці, з’яўляецца рабочым “Белшыны” і ніколі не меў сур’ёзных праблем з законам.

Праблемы з дзецьмі ў Настассі пачаліся ў разгар чарговага эканамічнага крызісу, калі многім беларусам давялося зацягнуць паясы. З грашовымі складанасцямі сутыкнулася і Навоева. У выніку яе дзяцей змясцілі ў сацыяльны прытулак. Сама ж маці-адзіночка трапіла ў СІЗА.