Хлопцы прыйшлі на вайсковыя зборы ў майках «Не — расейскай вайсковай базе». Іх адразу адпусцілі

Раніцай 12 кастрычніка яны згодна з позвамі прыбылі ў Дзяржынскі камісарыят, адкуль іх завезлі ў вайсковую частку СПА ў пасёлку Наваколасава. Праз некалькі гадзін актывістаў адпусьцілі дадому, аддаўшы вайсковыя білеты, паведаміў «Радыё Свабода» Мікалай Колас.

Мікалай Колас: «Мы надзелі майкі з надпісам „Не — расейскай вайсковай базе“, і гэтак сёння з'явіліся ў камісарыят. Там такіх, як мы, „партызанаў“ было чалавек дзесяць, у асноўным з Уздзенскага раёну. Нас усіх пасадзілі на аўтобус і адвезлі ў Наваколасава, у вайсковую частку СПА. Там некалькі гадзін пратрымалі, але ўзялі на зборы не ўсіх — палову. Нам з Алесем вярнулі вайсковыя білеты і адпусцілі дамоў. Сказалі, мы такія ім не патрэбныя».

Мікалай Колас мяркуе, што спроба забраць яго і ягонага сябра Алеся Рыбачэнку на зборы звязаная менавіта з іхнай грамадскай дзейнасцю.

«Хутчэй за ўсё, нас гэтымі зборамі хацелі запалохаць, каб сцішылі сваю палітычную актыўнасць. Перад выбарамі да мяне дамоў прыходзіў пажарны, старшыня сельсавету званіў, што прывезлі позву ў ваенкамат. Палохалі штрафамі гэтак, што маці давялося хуткую дапамогу выклікаць».

Мікалай Колас і Алесь Рыбачэнка бралі актыўны ўдзел у акцыях апазіцыі, якія праходзілі перад выбарамі, у тым ліку ў шэсці нацыянальнага сцяга 10 кастрычніка і шэсці па праспекце Незалежнасці 11 кастрычніка. Яны неслі расцяжку з надпісам «Байкот выбарам». На ранейшых акцыях на плошчы Свабоды яны былі ў майках з надпісамі супраць расейскай вайсковай базы.