У Барысаве звольнілі назіральніцу: “Заробак вам плоціць дзяржава. І куды вы палезлі?"

-Сёння мяне выклікала дырэктар Цэнтра і пранавала неадкладна звольніць мяне па пагадненні бакоў. Але я зразумела, што калі не падпішу па пагадненні бакоў, то пачнецца траўля - мне гэта абсалютна не трэба, у мяне для гэтага слабыя нервы. Пад мяне пачалі капаць, таму маглі проста звольніць па службовай неадпаведнасці, - расказала Таццяна Шаўчэнкава.

Назіральніца ў шоку ад імклівасці звальнення – у яе на руках 10-гадовы сын, якога яна выхоўвае адна, паведамляе "Права выбару-2015".

-Мне было сказана так: вы працуеце ў дзяржустанове, заробак вам плоціць дзяржава. І куды вы палезлі? Хацелі падзарабіць? Тады хай яны цяпер вас і кормяць; вы свабодны, пішыце заяву, - переказала словы дырэктаркі Таццяна Шаўчэнкава.

Асаблівых парушэнняў на ўчастку №41 назіральнікі за 6-8 кастрычніка не выявілі, сёння на ўчастку дзяжурыць яе напарнік.

-Я сёння адрабляю апошні працоўны дзень – з панядзелка я ўжо не працую. Я ўжо і працоўную кніжку забрала – усё адбылося настолькі хутка і аператыўна, - адзначыла Таццяна Шаўчэнкава.

У кампанію па назіранні за выбарамі "Права выбару-2015” уваходзяць восем арганізацый: Беларуская сацыял-дэмакратычная партыя (Грамада), Беларуская Хрысціянская Дэмакратыя, "Гавары праўду!”, "Рух "За Свабоду!”, Партыя БНФ, Беларуская партыя "Зялёныя”, незалежны прафсаюз Радыёэлектроннай прамысловасці, аргкамітэт Партыі Свабоды і прагрэса.