Статкевіч, Лябедзька і Някляеў завуць прайсці са сцягамі ад плошчы Свабоды да плошчы Якуба Коласа

Як і было заяўлена раней, збор 10 кастрычніка а 17-й гадзіне каля Ратушы. Мікалай Статкевіч і Уладзімір Някляеў заклікаюць браць з сабой сцягі і нацыянальную сімволіку.​

Пра змену фармату акцыі паведаміў Мікалай Статкевіч:

«Прыходзьце 10 кастрычніка а 17-й на плошчу Свабоды! Пакажам сваё стаўленне да iхняга балагану. Холадна не будзе, доўга гаварыць пра даўно зразумелае не выпадае. Лепей пройдзем па горадзе да плошчы Якуба Коласа з нацыянальнымi сімваламi. Мо мiлiцыянты ў iншым раёне меней пад нагамi ў прамоўцаў мiтусiцца будуць».

Уладзімір Някляеў у інтэрвію «Радыё Свабода» заявіў, што ўлады вымусілі арганізатараў пашырыць пратэстную акцыю:

«Улады абяцалі ўключыць ацяпленне, замест гэтага ўключылі выбарчую машыну на ўсю моц. За адзін дзень прагаласавалі 4,5 адсоткі выбарнікаў. Таму мы вырашылі пашырыць нашую пратэстную акцыю і зладзіць пасля мітынгу «Шэсце нацыянальнага сцяга».