Дэпутаты гатовы ўхваліць пагадненне аб расійскай авіябазе за месяц

Восеньская сесія Палаты прадстаўнікоў пачынаецца 2 кастрычніка. У планах заканадаўчай дзейнасці на кастрычнік разгляд пагаднення па авіябазе не пазначаны. Гэта, канечне, заўжды можна дапісаць дадатковым пунктам, але ці паспеюць яны вывучыць і ўхваліць пагадненне, каб полк расійскіх самалётаў паспеў законна прыляцець на аэрадром у Бабруйску?

“Так, тэарэтычна гэта магчыма, — упэўнена кажа Еўрарадыё дэпутат Палаты прадстаўнікоў Валерый Барадзеня. — Бо працэдурна, я думаю, для ўсіх гэтых ратыфікацый, абмеркаванняў, падпісанняў месяц — больш чым дастаткова. У гэтым моц нашай улады — што рашэнні могуць прымацца вельмі аператыўна. І ўзгадненні праходзяць таксама хутка. Калі трэба, нарады непасрэдна ў Адміністрацыі прэзідэнта, у Саўміне — вельмі хутка ўсё ўзгадняецца. Шчыльная супраца заканадаўчай і выканаўчай улады дазволіць у самыя сціслыя тэрміны прыняць неабходныя паперы”.

Аднак старшыня парламенцкай камісіі па нацыянальнай бяспецы Валерый Гайдукевіч выказваецца больш стрымана наконт імавернасці праходжання ўсіх працэдур да канца гэтага года.

“Усё залежыць ад таго, калі дакументы паступяць ў парламент. Тады і будуць іх разглядаць. Але ў нас ужо заканчваецца верасень, а дакументаў яшчэ ніякіх не паступала. І ў плане працы сесіі гэтыя дакументы не значацца”.

Расійскія СМІ паведамляюць, што ўжо са студзеня 2016 года расійская база ў Бабруйску пачне функцыяваць.