Хадановіч і Кустава заклікаюць беларусаў пайсці на выбары назіральнікамі

Відэаролікі з заклікамі стаць незалежнымі назіральнікамі на прэзыдэнцкіх выбарах публікуе праваабарончы сайт spring96.org.

Паэт і перакладчык Андрэй Хадановіч:

"Давайце гучна казаць — "крадзеж", гучна казаць — "няпраўда", гучна казаць — "злодзей"! Падманшчыку не павінна быць у нашых умовах занадта лёгка. Мы сваёй абыякавасцю ствараем такую лёгкасць. Зробім яго жыццё максімальна насычаным: хай ён чырванее, хай ён ёрзае, хай у яго вочкі бегаюць.

Кожны незалежны назіральнік — гэта такі кампетэнтны сведка, які ведае, што яму хлусяць. І той, хто хлусіць, таксама ведае, што побач стаіць чалавек, які ведае, што яму хлусяць».

Паэтка і журналістка Валярына Кустава:

"У сітуацыі выбараў мы ўсе тым ці іншым чынам заангажаваныя ў гульню выбараў. Таму лепей ведаць, што адбываецца, каб пазней зрабіць правільныя высновы, мець аргументы і факты, якія прадставіць грамадскасці, людзям, тым, хто гэтым займаецца, хто гэта аналізуе, робіць высновы і змяняе сытуацыю, каб нас болей не дурылі. Таму і ты назірай за гісторыяй».

Каб даведацца, як стаць грамадскім назіральнікам кампаніі "Праваабаронцы за свабодныя выбары", трэба патэлефанаваць па нумары +375 17 394-63-11 або напісаць на адрас: [email protected] .

Таксама праваабаронцы прапануюць прайсці дыстанцыйны відэакурс па грамадскім назіранні за выбарамі.