СЭТ запрашае на Багач у Вязынку

Студэнцкае этнаграфічнае таварыства і Дзяржаўны літаратурны музей Янкі Купалы  ўжо трэці раз ладзяць Багач у Вязынцы.

У народным календары Багач прымеркаваны да заканчэння збору ўраджая (“к гэтаму часу ў кожнага ўсяго багата”) і першаму запальванню хатняга агменю – васковай свечкі ў лубцы з жытам, якую ставяць на покуць і захоўваюць там на працягу ўсяго года, што прыносіць у дом багацце і шчасце. Абрад скіраваны на захаванне дабрабыту, ураджайнасці, плоднасці жывёлы, сямейнага ладу.

Асноўнай дзеяй свята з'яўляецца ссыпанне агульнага Багача, таму арганизатары просяць усіх гасцей захапіць з сабой па жменьцы зерня. 

У гэтым годзе на свяце праспяваюць урачыстыя дажынкавыя песні гурты Рутвіца, Мярэжа, Горынь, Дайнава і Варган, а танцавальную вечарынку зладзяць музыкі і танцоры клуба традыцыйнага танца Сіта. 

Акрамя таго, на свяце будзе працаваць дзіцячая пляцоўка з рознымі радасцямі, а для дарослых запланаваныя тэматычныя лекцыі і майстар-класы. Напрыклад, можна будзе паслухаць лекцыю Змітра Скварчэўскага "Святы восеньскага раўнадзенства ў беларускім народным календары", пасля чаго ён правядзе майстар-клас па вырабе васковых свечак "Свяча на Багач". 

Як заўжды, будзе дзейнічаць традыцыйная кухня і кірмаш. Пачатак свята ў 12.30.

Як даехаць: электрычка з Мінску едзе ў 11.30, прыбывае ў Вязынку ў 12.21. Назад з Вязынкі можна ехаць у 16.40, 17.54. Для ўваходу на тэрыторыю музея, дзе адбудзецца свята, трэба будзе набыць музейны квіток. Кошт квіткоў: дарослыя - 20 тыс. бел. руб., студэнты - 15 тыс. бел. руб., дзеці - 10 тыс. бел. руб.