Візавыя цэнтры ў Беларусі не могуць аднавіць працу

16 верасьня набылі сілу зьмены ў Правілы правядзеньня валютных апэрацыяў. З-за гэтага сярод іншага візавыя цэнтры страцілі магчымасьць прымаць у насельніцтва валюту ў якасьці консульскага збору — толькі беларускія рублі. Праз гэта візавыя цэнтры спынілі працу.

Самі візавыя цэнтры не даюць апэратыўнага камэнтару, просяць ператэлефанаваць пазьней ці адсылаюць з пытаньнямі на пошту, адкуль адказ адзіны: «Ваш зварот прыняты да разгляду». Амбасады краінаў, візавыя цэнтры якіх ёсьць у Беларусі, а таксама Міністэрства замежных спраў Беларусі сьцьвярджаюць, што праблема ня ў іх кампэтэнцыі: гэта справа саміх візавых цэнтраў.

Нацбанк заняў іншую пазіцыю — візавым цэнтрам нішто не замінае працаваць:

«Тым, хто выявіўся не гатовым да новых умоваў, хацелася б нагадаць, што валютнае заканадаўства Беларусі не ўтрымлівае абмежаванняў для візавых цэнтраў па пакупцы замежнай валюты для выканання сваіх абавязкаў перад амбасадамі, — заявіў БЕЛТА прадстаўнік Нацбанка. — Гэта значыць, ніякіх аб’ектыўных перашкодаў для паўнавартаснай працы гэтых юрыдычных асобаў сёння няма».

Аператары кол-цэнтраў візавых цэнтраў кажуць, што не чулі пра «дазвол на працу» ад Нацбанка, пакуль яны высвятляюць, як працаваць у новых умовах і не могуць сказаць, ці запрацуюць сёння, заўтра альбо праз тыдзень.

Тым часам амбасады ўсё яшчэ могуць прымаць ад насельніцтва валюту, яны працуюць у штатным рэжыме. Таксама працягнулі працу з візамі турфірмы, што працуюць наўпрост з амбасадамі і прапануюць кліентам самастойна аплочваць збор у валюце амбасады праз банк, паведамляе Радыё Свабода.