Барысаўскую снайпершу з "ДНР" арыштавалі ў Беларусі і пасадзілі на 12 гадоў?

Аднак афіцыйна пацвердзіць інфармацыю не ўдалося — у КДБ сказалі, што ім пра арышт Наталлі Красоўскай нічога не вядома і параілі з гэтым пытаннем звяртацца ў Следчы Камітэт, дзе таксама такой інфармацыяй не валодаюць. 

Але пры гэтым вядома, што апошні раз яе бачылі ў Маскве яшчэ ў снежні мінулага года. Там Наталля займалася вярбоўкай баевікоў у шэрагі арміі г. зв. «Наваросіі». Пасля гэтага, маўляў, снайперша жыла па падробных дакументах у Беларусі. 

Ці вярнулася яна на Данбас? З апошніх згадак пра яе ў інтэрнэце ўдалося адшукаць толькі адну, датаваную 7 верасня. Ды і тое, на даволі малачытэльным сайце. 

У артыкуле паведамляецца, што Красоўская нібыта «зафіксаваная 22 жніўня на пляжы каля Новаазоўска». Пры гэтым даецца спасылка на байца невядомага падраздзялення «Барса». 

У Беларусі Красоўская тэарэтычна магла быць асуджаная адразу па некалькіх артыкулах Крымінальнага кодэксу. Гэта 289 артыкул (тэрарызм), 133 артыкул (наёмніцтва), 132 артыкул (вярбоўка, абучэнне, фінансаванне і выкарыстанне наёмнікаў). Таксама Красоўская ў адным са сваіх відэазваротаў ускосна пагражала Аляксандру Лукашэнку, што таксама можа пацягнуць за сабою крымінальную адказнасць.