Вячаслаў Сіўчык вярнуўся ў Беларусь

На вакзале Вячаслава сустрэлі жонка, маці і сябры.

«Не збіраюся мяняць сваё жыццё, не збіраюся сыходзіць з палітыкі, ужо 17 верасня буду прымаць удзел у акцыі ў Мінску», — заявіў Вячаслаў Сіўчык у інтэрв'ю «Радыё Свабода».

Сваё рашэнне вярнуцца на радзіму Вячаслаў Сіўчык звязаў з чарговымі прэзідэнцкімі выбарамі ў Беларусі і зазначыў, што апазіцыі трэба скарыстацца змяненнем сітуацыі ў сувязі з расейскай агрэсіяй супраць Украіны. Раней рух салідарнасіці «Разам», які ўзначальвае Сіўчык, падтрымаў вылучэнне палітвязня Мікалая Статкевіча кандыдатам у прэзідэнты.

Цяперашнія выбары Вячаслаў Сіўчык назваў фарсам:

«Нічога ня думаю пра выбары і кандыдатаў. Бо, на жаль, беларуская нацыя пазбаўлена права выбіраць уладу. Рух салідарнасці „Разам“ гэтую кампанію заўсёды лічыў выбарчым фарсам і расцэньвае гэта як здзек з беларускай нацыі. Таму будзем дамагацца, каб беларуская нацыя мела права выбіраць уладу».

Вячаслаў Сіўчык з'ехаў у Кіеў пасля выбараў 2010 году. У Кіеве ён удзельнічаў у акцыях салідарнасці з беларускімі палітвязнямі і ў Еўрамайдане.

На мінулым тыдні ў Беларусь з палітычнай эміграцыі ў Чэхіі вярнуўся экс-кандыдат у прэзідэнты Беларусі Алесь Міхалевіч.