Някляеў рыхтуе акцыю супраць расійскіх ваенных баз у Беларусі

Акцыя пройдзе прыкладна за тыдзень да дня галасавання, 11 кастрычніка.

13 верасня аргкамітэт распаўсюдзіў заяву з прапановай у рамках выбарчай кампаніі правесці акцыю "За мірную, нейтральную Беларусь!".

"З апошніх дзеянняў кіраўніцтва Расійскай Федэрацыі ўсё больш відавочна, што Расія мае намер ператварыць Беларусь не проста ў сваю калонію, чаго з-за палітыкі цяперашняга беларускага рэжыму яна практычна дамаглася, а ў сваю ваенную базу. Гэта супярэчыць не толькі Канстытуцыі Рэспублікі Беларусь, згодна з якой Беларусь - нейтральная дзяржава. Гэта ставіць пад рэальную пагрозу бяспеку краіны і само жыццё беларусаў", - гаворыцца ў заяве.

"Мы плануем правесці пікет ці мітынг. Зараз я вяду перамовы з тымі апазіцыйнымі структурамі і грамадскімі арганізацыямі, хто мог бы далучыцца да гэтай акцыі, каб яна была як мага больш масавай. Менавіта для гэтага, масавасці і рэзанансу, нядрэнна было б, каб яна была санкцыянаванай", - сказаў Някляеў БелаПАН.

На яго думку, "праблема размяшчэння на тэрыторыі Беларусі ваенных баз, праблема мілітарызацыі Беларусі - гэта непасрэдная пагроза незалежнасці".