Падляшскі музей у Беластоку атрымаў працы Язэпа Драздовіча

Гэта элементы тэатральнай сцэнаграфіі, Драздовіч іх выканаў для Таварыства беларускай школы, якое ў міжваенны перыяд вяло тэатральную дзейнасць, паведамляе «Радыё Рацыя». На двух палотнішчах намаляваныя чатыры сюжэты, кажа старшыня БГКТ Янка Сычэўскі.

– З аднаго боку – прыродазнаўчыя акцэнты. З другога боку – архітэктурныя. Адзін замак, мабыць гэта замак Мірскіх, хаця не ўсе пагаджаюцца з тым, гэта не ілюстрацыя канкрэтнага замку, а толькі інспірацыя. А па-другое, гэта вуліца старой беларускай вёскі, дзе дамы пабудаваны яшчэ з круглякоў.

Палотны з малюнакамі Язэпа Драздовіча будуць адноўленыя і паказаныя ў памяшканнях Падляшскага музея.

Дадаткова ў наступным годзе рэжысёрка і акцёрка Ёанна Троц падрыхтуе спектакль па п’есе Васіля Дранько-Майсюка аб жыцці Драздовіча. Магчыма, што адбудуцца таксама публічныя чытанні п’есы ў Беластоцкім драматычным тэатры. Язэп Драздовіч жыў і ствараў у першай палове XX стагоддзя. Быў мастаком, археолагам, пісьменнікам, этнографам і фалькларыстам. Усё жыццё падтрымліваў беларускую адукацыю.