"І пабіў князь Маскву" (Відэа)

Тады трывала вайна. Маскоўцы пасля месячнай аблогі захапілі Смаленск і пустошылі ўсходнія землі Вялікага княства Літоўскага. Бараніць родную зямлю вырушыў разам з рыцарамі-ліцвінамі і польскімі ваярамі вялікі гетман князь Канстанцін Астрожскі. Пераправіўшыся праз Дняпро недалёка ад Воршы, літоўскае войска ўжо раніцай 8-га верасня мусіла адбіваць атакі маскоўцаў, паведамляе "Белсат".

Князь Астрожскі ўзначальваў усе контратакі і сам з мячом у руках біўся, як просты воін. Апоўдні літоўскія вершнікі прытворным адступленнем завялі маскоўскую конніцу пад залп сваіх гармат. Потым з прыбярэжнага лесу выскачыў атрад рэзервовай конніцы, які атакаваў нападнікаў з Усходу. Цяжкая маскоўская конніца адступіла на гразкіх берагах ракі Крапіўна паміж Воршай і Дуброўнам, панёсшы вялікія страты ад нашмат меншага па памерах войска ВКЛ. Рака Крапіўна пасля бітвы стала легендарнай, бо сведкі падавалі, што вада ў ёй стала крывавай, а сама рака праз вялікую колькасць трупаў «запаволіла свой бег».

Бітва пад Воршай сталася адной з буйнейшых у Еўропе ў пачатку XVI ст. Перамога ў ёй дала Вялікаму княству Літоўскаму магчымасць вярнуць захопленыя супраціўнікам Дуброўна, Мсціслаў і Крычаў. Пасля бітвы 4-гады трываў адносны супакой і маскоўцы па-за асобнымі малымі набегамі не адважваліся ўдзірацца ў ВКЛ. Бітву пад Воршаю летапісцы параўноўвалі з перамогаю антычнага вайскавода Сцыпіёна Афрыканскага з Рыму над славутым карфагенскім палкаводцам Ганібалам.

Князь Астрожскі быў адным з самых багатых людзей у Вялікім княстве, быўшы гаспадаром каля 100 местаў і мястэчак, 40 замкаў.

Адважны ваяр, рука якога не цуралася цяжкага мяча, слаўны пераможца, вялікі багацей і гаспадар на шматлікіх замках князь Астрожскі захаваў у сваім сэрцы шчырую сыноўскую любоў да Бацькаўшчыны, любячы зямлю сваіх продкаў, памятаючы пра хрысціянскі запавет: «Шануй свайго бацьку ды маці сваю».

З Днём беларускай вайсковай славы! Са святам, сябры!