Прэмію Гедройца атрымаў пісьменнік Віктар Казько за кнігу "Час збіраць косці"

Увечары 1 чэрвеня ў мінскім гатэлі "Renaissance" уручылі літаратурную прэмію Гедройца. Яе атрымаў Віктар Казько за кнігу "Час збіраць косці". Ён жа перамог паводле чытацкага галасавання. Галоўны прыз - 10 тысяч еўра.

Другое месца ў Таццяны Барысік, якая атрымала сертыфікат на адпачынак у Балтыйскім доме творчасці пісьменнікаў, паведамляе "Еўрарадыё". 

Віктар Казько прызнаўся, што яшчэ не ведае, на што патраціць грошы. Магчыма, на рамонт, на сям'ю, сказаў ён.

Прэмія Гедройца была заснаваная ў канцы 2011 года. Яна прысуджаецца за найлепшую кнігу прозы, якая выдадзена ў папярэднім годзе на беларускай мове ў жанрах "мастацкая проза" і "эсэістыка". Сёлета на конкурс даслалі 63 літаратурныя працы, з якіх журы спачатку выбрала 42 творы, а пасля засталіся шэсць аўтараў: Тацяна Барысік з кнігай "Жанчына і леапард", Альгерд Бахарэвіч - "Дзеці Аліндаркі", Антон Францішак Брыль - "Ян Ялмужна", Андрэй Гуцаў - "Кніга зданяў", Сяргей Дубавец - "Сіні карабель у блакітным моры плыве", Віктар Казько - "Час збіраць косці".

Нагадаем, летась літаратурную прэмію Гедройца атрымаў Ігар Бабкоў за кнігу "Хвілінка: Тры гісторыі". У 2012-м пераможцам быў Павел Касцюкевіч (за кнігу "Зборная РБ па негалоўных відах спорту"), у 2013 годзе - Уладзімір Някляеў (за кнігу "Аўтамат з газіроўкай з сіропам і без").