16 гадоў таму адбылася трагедыя на Нямізе

Па факце гібелі людзей была распачатая крымінальная справа, аднак вінаватых улады не знайшлі. Галоўным вінаватым у трагедыі быў фактычна прызнаны «збег абставінаў».

Кіраўнік праваабарончай арганізацыі «Прававая дапамога насельніцтву» Алег Воўчак мяркуе, што ўлада фактычна «прыкрыла» гэтую справу, хаця была відавочная бяздзейнасць міліцыі:

«І пракуратура гэтую лінію адстойвала. Але справа мела палітычны падтэкст, і пракурорам проста не далі яе завершыць. Разам з тым, два высокія чыноўнікі — начальнік міліцыі грамадскай бяспекі Мінгарвыканкаму Віктар Русак і начальнік аддзела масавых мерапрыемстваў Міхаіл Кандрацін — прызналі сваю віну, што нядбайна выконвалі свае службовыя абавязкі. Але асуджаныя міліцэйскія чыноўнікі не былі. Родныя ахвяраў таксама неаднаразова зьвярталіся ў суды з пазовамі да гарадскіх уладаў, міліцыі, арганізатараў „Піўнога фэсту“ — піўзаводу „Аліварыя“, радыёстанцыі „Мір“ і кампаніі „Клас-клуб ДК“ — аднак гэтыя пазовы не былі задаволеныя.

Ці зрабілі ўлады адпаведныя высновы? Так, крыху палепшана арганізацыя мерапрыемстваў. Але ўсё адно ў зонах кантролю — масавае скопішча людзей, цісканіна. Вось і 9 мая, падчас святкавання Дня перамогі, перакрывалі рух, столькі было неразбярыхі... У нас была прапанова: масавыя буйныя мерапрыемствы, святы выносіць за межы гораду.

Што да дапамогі родным ахвяраў і пацярпелым у гэтай трагедыі, то ўлада пра іх ужо забылася. Як забылася і пра пацярпелых падчас выбуху ў метро на Кастрычніцкай».

Мемарыяльны знак на месцы трагедыі паўстаў у выніку намаганняў бацькоў і сваякоў загінулых, нагадвае «Радыё Свабода». Людзі хацелі пабудаваць маленькую каплічку каля месца трагедыі, але ім не дазволілі.