Даклад аб дыскрымінацыі беларускамоўных вывучаецца ўрадавымі чыноўнікамі

Пра гэта паведаміў рэгіянальны прадстаўнік БХК Леанід Мархотка, каментуючы сітуацыю з разглядам даклада зацікаўленымі бакамі.

На дадзены момант вядома, што Савет Міністраў накіраваў даклад у Міністэрства юстыцыі, Міністэрства адукцыі і Мінскі аблвыканкам. У Палаце прадстаўнікоў вывучэнем дакладу займаецца Пастаянная камісія па адукацыі, культуры і навуцы. Генеральная пракуратура перанакіравала дакумент у пракуратуру Мінскай вобласці. Старшыня Салігорскага раённага Савета дэпутатаў Лідзія Клішэвіч паабаяцала разгледзець даклад на бліжэйшым паседжанні прэзідыума.

З фармальных прычын Адміністрацыя прэзідэнта пакінула даклад без разгляду, паведамляе праваабарончы цэнтр «Вясна». Зрэшты, пасля выканання усіх фармальнасцяў спадар Мархотка паўторна накіраваў дакументы ў Адміністрацыю.

Першыя адказы па сутнасці ўзнятых у дакладзе пытанняў салігорскія праваабаронцы спадзяюцца атрымаць ужо на гэтым тыдні.