У Вялікабрытаніі пайшоў з жыцця айцец Аляксандр Надсан

Нарадзіўся будучы святар у сям’і настаўнікаў у мястэчку Гарадзея, што ў Нясвіжскім раёне. Падчас нямецкай акупацыі навучаўся ў настаўніцкай семінарыі, скончыў Мінскую афіцэрскую школу Беларускай краёвай абароны. Потым перабраўся ў Францыю, дзе далучыўся да антыфашысцкага руху супраціву, пазней удзельнічаў у складзе польскіх фармаванняў генерала Андэрса ў бітве з гітлераўцамі пад Монтэ-Касіна. У 1953 г. скончыў матэматычны факультэт Лонданскага ўніверсітэту. Стаў адным з заснавальнікаў Згуртавання беларусаў у Вялікабрытаніі.

У 1958 г. рукапаложаны ў сан святара. Айцец Надсан – дырэктар найбуйнейшай замежнай беларускай бібліятэкі імя Францішка Скарыны ў Лондане і кіраўнік Беларускай каталіцкай місіі ў Вялікай Брытаніі. Аўтар шэрагу кніг па гісторыі Беларусі ды першых, і адзіных пакуль, перакладаў візантыйскіх літургічных тэкстаў на беларускую мову, нагадвае Белсат.