Мінабароны на звароты па-беларуску адказвае выключна на рускай мове

Цягам апошніх двух месяцаў спадар Малочка накіраваў у розныя інстанцыі шэраг запытаў адносна пераносу помніка-абеліска загінулым у часы Другой сусветнай вайны жыхарам вёскі Крывічы Салігорскага раёна. Сярод іншых ведамстваў лісты былі накіраваны ў Цэнтральны архіў Міністэрства абароны Рэспублікі Беларусь, ва Упраўленне па ўшанаванні абаронцаў Бацькаўшчыны і ахвяр войн Узброеных Сіл Рэспублікі Беларусь, а таксама ў Салігорскі раённы ваенны камісарыят Мінскай вобласці. Усе запыты ў вайсковыя структуры Міністэрства абароны былі зроблены на беларускай мове, аднак ніводнага адказу на роднай мове Віктар Малочка ад іх не атрымаў.

У сувязі з гэтым партыец быў вымушаны звярнуцца ў пракуратуру, паведамляе праваабарончы центр «Вясна». Ужо падчас пракурорскай праверкі намеснік дырэктара Цэнтральнага архіва Міністэрства абароны Рэспублікі Беларусь У. Я. Калаткоў афіцыйна выбачыўся за дадзены раней адказ на рускай мове, а не на мове звароту спадара Малочкі. Пракурорская праверка па факце парушэння заканадаўства Рэспублікі Беларусь іншымі структурамі Міністэрства абароны пакуль яшчэ працягваецца.