У Ігара Логвінава забралі літаратуру на беларуска-літоўскай мяжы

Як распавёў прэс-службе ГА “БАЖ” Ігар Логвінаў, выпадак адбыўся 9 красавіка на мытным пераходзе Каменны Лог. Выдавецтва “ЛогвінаЎ” да кнігі дачыненні не мела – яе выпусціў ЕГУ, а Ігара Логвінава проста папрасілі захапіць 20 асобнікаў і завезці на прэзентацыю ў Мінску.

Падставай для вынятку кнігі стала падазрэнне, што яна можа нанесці шкоду дзяржаўным інтарэсам Рэспублікі Беларусь. Па словах Логвінава, мытнікі доўга гарталі яе і ў выніку вырашылі затрымаць. Па іх словах, цяпер на мытні ўведзены “больш жорсткі рэжым” адносна інфармацыйнай прадукцыі. Быў складзены акт адбору проб і ўзораў. Ігару Логвінаву сказалі, што ён можа тэлефанаваць на мытню, каб даведацца пра далейшы лёс кніг.