Жыхара Брэста, якога абвінавачваюцьу паклёпе на Лукашэнку, кінулі ў псіхушку

Больш за 10 гадоў берасцеец вёў адмысловы палітычны блог на сваім плоце. Увесь гэты час гарадскія ўлады шукалі магчымасць спыніць непакорнага. І знайшлі.

Спачатку на Міхаіла Лукашэвіча Следчы камітэт завёў крымінальную справу за паклёп на прэзідэнта (частка 1 артыкулу 367 Крымінальнага кодэксу РБ), потым былі знішчаныя надпісы на плоце, а іх аўтар апынуўся ў псіхіятрычнай лякарні, паведамляе Белсат.

Зараз праваабаронцы не маюць сувязі з Міхаілам Лукашэвічам, але ў Следчым камітэце ім заявілі, што мужчына знаходзіцца ў псіхіятрычнай лякарні. Акалічнасці таго, як ён там апынуўся, невядомыя.

Суседзі мужчыны кажуць, што дамоў да Лукашэвіча прыехала міліцыя, а потым з’явіўся нейкі чалавек, які зафарбаваў усе надпісы, што тычыліся ўладаў. Самога мужчыну суседзі даўно не бачылі.