Палітзняволенага Юрыя Рубцова адправілі ў Следчы камітэт з рэчамі. Распачата крымінальная справа

Як паведаміў актывіст Леанід Кулакоў, нечаканымі сведкамі гэтага этапавання сталі сябры і паплечнікі палітзняволенага, якія прыехалі з Мінску, каб праведаць Рубцова і перадаць яму неабходныя рэчы і прадукты харчавання, паведамляе сайт spring96.org.

Праваабаронца Леанід Судаленка паведаміў, што супраць Юрыя Рубцова заведзеная крымінальная справа па артыкуле 415 Крымінальнага кодэксу (ухіленне ад адбыцця пакарання ў выглядзе пазбаўлення волі). Гэты артыкул прадугледжвае пазбаўленне волі тэрмінам на 3 гады.

Ужо на "хіміі" палітвязень Юры Рубцоў зрабіў на грудзях татуіроўку "Лукашэнка, сыходзь!". Раней ён меў шмат праблем праз футболку з адпаведным лозунгам.

"Скура не футболка, яе не сарвуць, - пракаментаваў Рубцоў свой учынак. - А шкадаваць потым не буду. Мне больш шкада тых маек, што ў мяне забралі і не вярнулі".

Юрый Рубцоў 6 кастрычніка 2014 года быў асуджаны судом Цэнтральнага раёну Менска па арт. 391 Крымінальнага кодэкса (“Абраза суддзі або народнага засядацеля”) да 1 года і 6 месяцаў абмежавання волі з накіраваннем ва ўстанову адкрытага тыпу № 7. 22 снежня 2014 года накіраваны для адбыцця пакарання ў вёску Куплін Пружанскага раёна.