"ЕўраБеларусь" вызначыла пераможцаў прэмii "Грамадзянская супольнасць у фокусе рэгіянальных СМІ"

У 2014 годзе Міжнародны кансорцыум «ЕўраБеларусь» ініцыяваў прэмію, якой ўзнагароджваюцца лепшыя журналісцкія матэрыялы, апублікаваныя ў рэгіянальных Інтэрнэт-СМІ. Адбор праходзiў сярод матэрыялаў, прысвечаных падзеям і ініцыятывам грамадзянскай супольнасці. Пераможцамі 2-га этапу конкурсу, у якім удзельнічалі матэрыялы, апублікаваныя ў студзені-сакавіку 2015-га года, сталі журналісты “Бабрускага кур’ера”, “Край.by» і “Моцных навін”.

У намінацыі «Падзея» лепшым прызнаны матэрыял Кацярыны Сушко пра прэзентацыю “Зялёнай карты” у Маладзечна, апублікаваны на інфармацыйна-навастным партале Край.by.

Пераможцам у намінацыі “Партрэт грамадскай ініцыятывы" стаў прыгожы расповед Максіма Данілава пра незвычайную дабрачынную ініцыятыву ў Гомелі з сайта “Моцных навін”, а ў намінацыі «Вострая сацыяльная праблема» перамог матэрыял Марыны Міхневіч, назва якога гаворыць сама за сябе: “Адкрыцця музея Алеся Адамовіча ў 2015 годзе не будзе” (“Бабруйскі кур’ер”).

Шчыра віншуем пераможцаў! У бліжэйшы час узнагароды знойдуць сваіх герояў, чакайце рэпартажу і інтэрв'ю з пераможцамі на нашым сайце!

Даведка

Пераможцы першага этапу прэміі «Грамадзянская супольнасць у фокусе рэгіянальных СМІ»:

У намінацыі «Падзея»: Зоя Хруцкая, “Рэгіянальная газета”;

У намінацыі «Партрэт грамадскай ініцыятывы": Алесь Гізун, Баранавіцкі навінавы партал intex-press.by;

У намінацыі «Вострая сацыяльная праблема ці канфлікт»: Арцём Гарбацэвіч, Баранавіцкі навінавы партал intex-press.by.

Навошта гэтая прэмія, што мы хочам змяніць? У першую чаргу мы хочам дамагчыся больш шырокага асвятлення дзейнасці грамадскіх арганізацый, ініцыятыў і асобных людзей, якія займаюцца агульназначнымі пытаннямі, вырашаюць важныя для горада і краіны праблемы або ўзбагачаюць жыццё культурнымі падзеямі ды самім сваім існаваннем. Яшчэ адной задачай прэміі з'яўляецца стымуляванне творчага і зацікаўленага (няхай часам і крытычнага!) стаўлення журналістаў і рэдактараў рэгіянальных СМІ да тэмаў і праблемаў, якія паднімаюцца грамадзянскай супольнасцю.

За што ўручаецца прэмія? Гэтым разам прэмія ўручаецца за лепшыя матэрыялы, якія адпавядаюць пастаўленым задачам, апублікаваныя на сайтах рэгіянальных СМІ ў студзені-сакавіку 2015 года. Кожныя тры месяцы мы адзначаем лепшыя журналісцкія працы, якія найбольш глыбока, востра або крэатыўна асвятляюць дзейнасць грамадскіх і культурных ініцыятыў.

Як вызначаліся пераможцы? Былі прааналізаваныя матэрыялы тых інтэрнэт-рэсурсаў, якія мы здолелі ідэнтыфікаваць у якасці рэгіянальных СМІ, за апошнія тры месяцы. З усіх матэрыялаў былі адабраны тыя, якія задавальняюць крытэрам прэміі. Пасля гэтага журы, якое складаецца з сябраў Міжнароднага кансорцыума "ЕўраБеларусь" вызначыла пераможцаў у трох тэматычных намінацыях: «Падзеі», «Партрэт грамадскай ініцыятывы», «Вострая сацыяльная праблема ці канфлікт».