У Вільні ўшанавалі памяць Кастуся Каліноўскага

Мерапрыемства распачалося традыцыйным шэсцем, якое сімвалічна можна назваць апошнім шляхам Кастуся Каліноўскага. Менавіта 22 сакавіка 1864 года рускія акупанты вывелі з муроў турмы на вул. Ігната 11 Кастуся і павялі яго на Лукішскі пляц, каб яго знішчыць.

Прайсціся апошнім шляхам Кастуся рашылі не толькі віленчукі, але і шматлікія госці з Мінску, Рыгі, Варшавы і іншых гарадоў. Ля крыжа стаяла ганаровая вайсковая варта і літоўскія грамадскія і палітычныя дзеячы.

Літоўскія палітыкі ў сваіх прамовах адзначалі, што ў нас агульная гісторыя і агульныя праблемы, таму нам, грамадзянам Вялікага Княства Літоўскага трэба аб’ядноўвацца, быць разам, як і паўтара стагоддзя назад, калі разам паўсталі, каб бараніць сваю бацькаўшчыну і сваю зямлю.

“Была ганаровая варта ад літоўскіх вайскоўцаў. Шмат было прадстаўнікоў з літоўскага боку. І я сказаў, што вітаю працяг традыцыі ўшанавання памяці Каліноўскага да сённяшняга дня. Яна становіцца штораз больш багатай. Я б сказаў, што людзей было многа, нягледзячы на тое, што гэта няроўная дата – 151 год. Чалавек 70-100. Было шмат сцягоў – беларускіх, латышскіх, украінскіх”, - сказаў “Радыё “Рацыя” беларускі грамадска-культурны дзеяч у Літве Хведар Нюнька.