Еўропа можа прыняць Беларусь у Балонскі працэс у якасці жэсту добрай волі

23-24 сакавіка ў Рызе праходзіць пасяджэнне Грамадскага Балонскага камітэта. На думку сябра Грамадскага Балонскага камітэта Уладзіміра Дунаева, шанцы ўступіць у Балонскі працэс у Беларусі вельмі высокія. І хоць рашэнне пасяджэення камітэта “практычна канчатковае", апошняе слова будзе сказана на саміце міністраў адукацыі 14-15 мая ў Ерэване.

Балонская рабочая група падрыхтавала да мерапрыемства альтэрнатыўны даклад. У ім пазначана, што, нягледзячы на бачны прагрэс, па асноўных каштоўнасцях Балонскай сістэмы істотных зрухаў у Беларусі не назіраецца, распавёў Дунаеў. Пытанні застаюцца да інстытуцыйнай аўтаноміі, акадэмічных свабод і студэнцкага ўдзелу ў кіраванні ВНУ. Па гэтых жа пунктах у Балонскі працэс Беларусь не прынялі ў мінулы раз — тры гады таму.

Становішча з аўтаноміяй ВНУ, свабодамі і ўдзелам студэнтаў засталося без бачных зрухаў, і да гэтага часу гэтыя каштоўнасці адзінай еўрапейскай прасторы не былі ажыццёўленыя ў беларускім заканадаўстве. "Больш за тое, мы адзначаем узмацненне акадэмічных рэпрэсій", — кажа Дунаеў.

"Пропуск у Балонскі працэс разглядаецца сёння як разменная манета. Ідзе гандаль паміж Беларуссю і Еўропай. Еўропа гатовая зрабіць такі жэст. Маўляў, нават, нягледзячы на тое, што вы не адпавядаеце патрабаванням, мы вас прымаем у Балонскі працэс, каб засведчыць сваю зацікаўленасць у еўрапейскім вектары развіцця Беларусі. Гэта вельмі дрэнна, таму што гэта палітызацыя рашэння. З іншага боку, гэта апраўдана для геапалітычных мэтаў", адзначыў Дунаеў, паведамляе “Наша ніва” са спасылкай на tut.by.