Логвінаву далі адтэрміноўку на два месяцы

«Мы падавалі хадайніцтва аб адтэрміноўцы штрафу. Нам далі растэрміноўку на два месяцы роўнымі часткамі. Нам проста далі час дазбіраць гэтыя грошы. Мы амаль што ўсю патрэбную суму сабралі, не хапае некалькі тысячаў. Зараз прыедзем у Мінск і будзем разбірацца. Але ў нас няма іншага выйсця, бо калі не разлічымся, у нас усё забяруць», — паведаміў выдавец Ігар Логвінаў карэспандэнту «Радыё Свабода».

То бок, казаць пра нейкія паслабленні з боку ўладаў не даводзіцца, адзначыў выдавец.

Эканамічны суд Мінску 9 студзеня 2015 года пастанавіў, што за гандаль без ліцэнзіі «Кнігарня Логвінаў» павінна заплаціць штраф і вярнуць «незаконны прыбытак». Агулам гэта 967 мільёнаў рублёў. У 2014 годзе кнігарня шэсць разоў безвынікова спрабавала атрымаць рэгістрацыю на гандаль кнігамі.

Да збору сродкаў для пагашэння запазычанасці далучылася грамадскасць у Беларусі і за мяжой.

Да прыкладу, творчая супольнасць Беларусі і Польшчы запусціла інтэрнэт-аўкцыён auction.savelohvinau.club у падтрымку выдавецтва «Логвінаў», на якім свае працы выставілі многія беларускія мастакі. Сродкі, атрыманыя ад продажу лотаў, пералічваліся непасрэдна на дабрачынны рахунак прадпрыемства.