Улады не спыняюць пераслед журналістаў за працу без акрэдытацыі

23 лютага журналістка наведала аддзяленне міліцыі, дзе ўчастковы Сяргей Несцяровіч паведаміў Шчапёткінай пра справу, заведзеную па арт. 22.9 КаАП (“незаконны выраб і распаўсюд прадукцыі СМІ”). Журналістку абвінавачваюць у падрыхтоўцы інтэрв’ю з супрацоўнікам ДАІ Сяргеем Мілітовічам для “Беларускага Радыё Рацыя”. Паводле матэрыялаў справы, Тамара Шчапёткіна нібыта 8 студзеня 2015 года правяла з міліцыянтам гутарку, якая пазней з’явілася на сайце радыё.

– Ніякага інтэрв’ю з названым міліцыянтам я не рабіла, хоць сапраўды была ў гэты дзень у Брэсце. Я прысутнічала на судовым працэсе па гучнай справе пра нібыта напад на супрацоўнікаў ДАІ, – распавяла прэс-службе ГА “Беларуская асацыяцыя журналістаў” Тамара Шчапёткіна.

Справу журналісткі будзе разглядаць суд Ленінскага раёна Брэста 27 лютага аб 11-й гадзіне.

Нагадаем, што 17 снежня мінулага года Тамару Шчапёткіну ўжо пакаралі штрафам у 30 базавых велічыняў па тым жа артыкуле.

Наогул на працягу 2014 года міліцыя ўзбуджала як мінімум 14 спраў у дачыненні да журналістаў за супрацу з замежнымі СМІ без акрэдытацыі, звінавачваючы іх у парушэнні арт. 22.9 ч. 2 КаАП (“незаконны выраб і распаўсюд прадукцыі СМІ”).

Агульная сума штрафаў, спагнаных судамі з журналістаў па гэтым артыкуле ў 2014 годзе, склала больш за 52 млн рублёў.

У 2015 годзе таксама ўжо адбыўся адзін суд над журналісткай Алінай Літвінчук. Яе аштрафавалі на 30 базавых велічынь па справе, заведзенай у 2014 годзе.