Гомельскі актывіст Жукоўскі правядзе 10 сутак у ізалятары

Жонка Кастуся Жукоўскага Алена дазналася пра затрыманне мужа ўвечары 20 лютага.

“Мне ў 20 гадзін вечара патэлефанавала незнаёмая жанчына і сказала, што Кастусь Жукоўскі затрыманы на 10 сутак. Я спыталася, па якой прычыне? Мне адказалі, што нешта адбылося ў аблвыканкаме. У ізалятары ад мяне прынялі перадачу мужу, але толькі адзенне і сродкі гігіены”, - паведаміла яна “Радыё Рацыя”.

Паводле Алены Жукоўскай, у пакінутай мужам машыне яна знайшла некалькі асобнікаў скаргі на таварыства з абмежаванай адказнасцю „Цэнтр Лізінг”.

Гэтая камерцыйная структура з дазволу Гомельскага гарвыканкама вядзе будаўніцтва шматпавярховага дома ў адлегласці ў некалькі метраў ад прыватнай хаты Кастуся Жукоўскага. Актывіст хацеў звярнуць увагу ўладаў на чарговыя парушэнні нормаў будаўніцтва.