Прадзюсер фільма "Авель" ("Мы, браты") паабяцаў вярнуць у казну 20 мільярдаў рублёў

Вакол фільма "Мы, браты" (працоўная назва "Авель") разгарэўся чарговы скандал. На 14-м з'ездзе кінематаграфістаў, які адбыўся днямі ў Мінску, прайшла інфармацыя, быццам стваральнікі фільма ўцяклі з вялікім грашыма, а сам фільм стаў вялікім пшыкам і дагэтуль не выйшаў на экраны, нагадвае Еўрарадыё.

Год таму генеральны прадзюсар кампаніі Nonstop Media Сяргей Ждановіч абяцаў паказаць фільм на беларускім кінафестывалі "Лістапад" напрыканцы 2014 года. Аднак падчас фэсту фільм так і не з'явіўся на экранах, Цяпер стваральнікі фільма абяцаюць прэм'ерны паказ 18 красавіка 2015 года.

У каментарыі Радыё Свабода Ждановіч паведаміў, што робіцца англійская версія фільма для міжнародных паказаў, таму больш канкрэтныя тэрміны ён зможа назваць пазней.

Ждановіч кажа, што на вытворчасць фільма было выдаткавана з бюджэту 20 мільярдаў рублёў, якія выдаваліся да канца 2014 года. Па яго словах, гэта склала 1,8 млн долараў. Прадзюсар кажа, што заклаў пад вытворчасць фільма сваё жтыло і офіс, піша "Комсомольская правда". Але ён упэўнены, што пракат фільма не толькі верне ўсе выдаткаваныя грошы, але і прынясе прыбытак.