Ігар Логвінаў плануе запусціць электроннае выдавецтва

«Мы плануем запусціць электроннае выдавецтва, паколькі гэтая сфера ніяк не рэгламэнтаваная беларускім заканадаўствам і, шчыра кажучы, з'яўляецца найбольш перспектыўным накірункам у сучаснай выдавецкай індустрыі. Акрамя таго, мы будзем працягваць выпускаць папяровыя выданні пры дапамозе нашага літоўскага выдавецтва», - паведаміў Ігар Логвінаў падчас онлайн-канферэнцыі на сайце «Радыё Свабода».

Паводле Логвінава, «поўных гарантый новых штрафаў няма, але гэта не падстава скончваць нашу дзейнасць». «Нават у самых неспрыяльных абставінах заўсёды застаецца магчымасць знайсці шляхі для ажыццяўлення сваёй дзейнасці», - дадаў ён.

Выдавец кажа, што маецца вельмі шмат версій, чаму ўлады прычапіліся менавіта да «Логвінава», але «асноўны вектар можна акрэсліць як непрыманне нас у якасці публічнай прасторы і занадта свабоднай культурнай пляцоўкі».

Нагадаем, 11 лютага Вярхоўны суд Беларусі пацвердзіў рашэнне Гаспадарчага суду, і кнігарня «Логвінаў» мае цягам 2 тыдняў цалкам выплаціць штраф — 1 мільярд рублёў. У інтэрнэце працягваецца кампанія збірання сродкаў для «Логвінава». Пакуль сабралі толькі чвэрць патрэбнай сумы.