Яўген Васьковіч атрымаў першае за чатыры гады зняволення спатканне з маці

Яўген Васьковіч, які напрыканцы мінулага года быў пераведзены з турмы ў калонію №15 Магілёва, атрымаў першае за чатырыгады зняволення спатканне з маці. Рушання Васьковіч паехала на суткавае спатканне адна, паведамляе сайт ПЦ "Вясна".

Яўген Васьковіч ў калоніі старанна выконвае сваю працу і спадзяецца на датэрміновае вызваленне.

- Гаворыць, што ўжо лепей у яго пачало атрымлівацца шыць целагрэйкі. Канешне, на тое, што яго адпусцяць да выбараў, мы і не спадзяемся. Шмат чытае, калі ёсць вольны час, па магчымасці адказвае на лісты. Жэня вельмі ўдзячны ўсім за падтрымку, усіх абдымае! Кажа, як толькі вернецца дахаты, усіх сяброў збярэ і накрые для іх стол, - распавяла маці асуджанага Яўгена Рушання Васьковіч.

Журналіст, сябра ГА БАЖ Яўген Васьковіч, які з'яўляецца таксама актывістам аргкамітэта па стварэнні партыі "Беларуская хрысціянская дэмакратыя", быў асуджаны ў маі 2011  года за спробу падпалу  будынка Бабруйскага КДБ - па ч.2 арт.339 КК (злоснае хуліганства) і ч.3 арт.218 КК (пашкоджанне маёмасці ў асабліва буйным памеры) - да 7 гадоў пазбаўлення волі ва ўмовах ўзмоцненага рэжыму.