У Мінску АМАП сарваў панк-канцэрт вядомых анархістаў з Італіі

Супрацоўнікі міліцэйскага АМАПа сарвалі панк-канцэрт у мінскім клубе "Піраты", на якім збіраліся выступіць тры калектывы з Беларусі і вядомы анархісцкі гурт з Італіі Kalashnikov, паведамляе "Еўрарадыё".  

Мерапрыемства мусіла пачацца ў 18 гадзінаў 10 студзеня. Па словах сведак, неўзабаве пасля пачатку да клуба пад’ехалі міліцыянты.

"Прыехалі спачатку два бобікі, амап (або хто там быў) разляцеўся ў двары і клуб. Крыху пазней пад’ехалі 2 аўтазакі, затым 1 бус з амапам і нібыта яшчэ 1 аўтазак", - піша ў сацсетках адзін з відавочцаў падзеяў.

Яшчэ адзін сведка ўдакладняе:

"Унутры ўсіх шманалі, перапісвалі дадзеныя і запісвалі на відэа. Недзе 1,5 або 2 гадзіны ўсё адбывалася. Затым усіх адпусцілі, але і забралі нейкую колькасць людзей (дакладна не ведаю колькі). Спачатку ўсіх валілі на падлогу, а затым да сцяны. Побач са мной стаяла дзяўчына, і ў яе ішла кроў з носа".

Паведамляецца, што былі затрыманыя тры чалавекі, якія гандлявалі панк-атрыбутыкай. Іх адвезлі ў РУУС Ленінскага раёна.

Па непацверджанай інфармацыі, перад пачаткам канцэрта на аднаго ці трох наведвальнікаў напалі неанацысты.

"З нагоды бонаў - напалі не на аднаго чалавека, як мінімум на трох", - удакладняе відавочца.

Міліцыя пакуль не каментуе здарэнне ў клубе "Піраты".