Ваенны журналіст Аляксандр Алесін можа праходзіць па справе аб шпіянажы як сведка

«Нам пазванілі і сказалі, што абвінавачанне бацьку пакуль не выставілі. Сказалі, што следчыя больш цікавяцца не бацькам, а тым чалавекам, з якім ён быў у кавярні. Што да таго чалавека ёсць падазрэнні ў шпіянажы, а ўжо бацька быў з ім, і ягоны статус цяпер вызначаецца. Мы спадзяемся, што да выстаўлення яму абвінавачанняў не дойдзе», - цытуе Радыё Свабода аднаго з дзяцей.

Аляксандр Алесін быў затрыманы 26 ці 27 лістапада — КДБ дакладнага дня не паведамляе. Ці абараняе хто з адвакатаў інтарэсы журналіста? Паводле звестак сваякоў Алесіна, спачатку яму быў дадзены гэтак званы «дзяжурны» адвакат, якога сваякі збіраліся замяніць, але пакуль гэтага не адбылося.

«У нас ёсць планы наконт адваката, нам прапанавалі чалавека, але зноў нагадаю, што была размова з супрацоўнікамі КДБ, і тыя сказалі, каб мы пачакалі да панядзелка. Таму мы і вырашылі, што калі б было ўсё гэтак сур'ёзна, дык трэба было б весці да яго незалежнага адваката. Магчыма, усё ж і не будзе ніякага абвінавачання, і яго выпусцяць. Таму мы вельмі разлічваем на другую палову дня».

У КДБ сітуацыю з Аляксандрам Алесіным па-ранейшаму не каментуюць.

Звесткі пра затрыманне Аляксандра Алесіна паводле падазрэнняў у здрадзе Радзіме і шпіянажы з’явіліся ў канцы мінулага тыдня. Гэтыя звесткі пакуль пацвердзілі толькі сваякі журналіста і праваабаронцы.