Алесь Бяляцкі: Прысуды Навальным — класічная схема, якая існуе і ў Беларусі

«Не толькі беларускія ўлады выкарыстоўваюць любыя артыкулы Крымінальнага кодэксу, якія б маглі дыскрэдытаваць няўгодных ім людзей — грамадскіх актывістаў і праваабаронцаў. Напрыклад, артыкул, па якім быў асуджаны я, ужываўся супраць праваабаронцаў у 16 краінах. Дастаткова актыўна ён выкарыстоўваецца супраць праваабаронцаў цяпер у Азербайджане. Таму няма нічога дзіўнага, што і там, у Расіі, каб прыбраць нявыгаднага ўладам чалавека, які знаходзіцца ў жорсткай апазіцыі, крытыкуе расійскія ўлады за карупцыю, крытыкуе канкрэтна Уладзіміра Пуціна, быў скарыстаны такі прыём. Улады выкарыстоўваюць любыя магчымасці і здавалася б непалітычныя артыкулы для таго, каб прымусіць замаўчаць — Навальнага і падобных яму людзей», — адзначыў былы беларускі палітвязень.

Тое, што рэальна на 3,5 гады за краты пойдзе не Аляксей Навальны, а яго брат Алег, таксама мае паралель зь беларускай рэчаіснасцю, зазначае Алесь Бяляцкі ў каментары Радыё «Свабода»:

«Улады выкарыстоўваюць такі прыём, у выніку якога больш церпіць не сам актывіст, а яго сваякі. Такім чынам намацваюцца кропкі, каб ціснуць на няўгодных людзей праз іх сваякоў. У выпадку з Навальнымі — проста класычная схема. Калі браць беларускую рэчаіснасць, то я б прыгадаў Вінцука і Франака Вячоркаў і тое, як улады спрабавалі заціснуць сына, каб бацька спыніў сваю палітычную актыўнасць».