Гурт BRUTTO зняў кліп на песню "Наша возьме" (відэа)

На экраны YouTube выйшаў новы кліп BRUTTO. На гэты раз была экранізаваная беларускамоўная песня «Наша возьме» — адзін з краевугольных трэкаў дэбютнага альбому гурта. Рэжысёрам стаў удзельнік BRUTTO Дзмітры «Сякера» Казлоўскі, які раней зрабіў кліп на песню Underdog. У здымках новага відэа бралі ўдзел гульцы мінскай каманды па амерыканскім футболе «Літвіны».

«Я — вулічны баец, і гэтым відэа хацеў паказаць бітву знутры, — пракаментаваў прэм’еру Дзмітры Казлоўскі. — Музыкі і спартоўцы, BRUTTO і „Літвіны“ — браты! Мы змагаемся, калі спяваем, спяваем, калі перамагаем, і нашы бітвы — гэта таксама мастацтва».

«Наша возьме» — пяты афіцыйны кліп гурту, нагадвае “Радыё Свабода”. Раней былі экранізаваныя песні BRUTTO «Underdog», «Гіры», «Мяч», а таксама зробленыя два лірычныя відэа на «Адыдас» і «Будзь адважным». З усімі відэапрацамі можна азнаёміцца на афіцыйным канале BRUTTO ў YouTube.

Найбліжэйшы канцэрт BRUTTO адбудзецца 27 снежня ў Кіеве.