Вардамацкі: Прарасійскія настроі зніжаюцца, усё больш беларусаў лічаць анексію Крыма незаконнай

Вынікі лістападаўскага апытання, якое праводзіла Беларуская аналітычная майстэрня, сведчаць, што колькасць тых у Беларусі, хто апраўдвае далучэнне Крыма, склала 59,9% у параўнанні з 67,8% у верасні. “Гэта значыць, на 7,9% менш. А гэта ўжо статыстычна значная велічыня, якая выходзіць за рамкі хібнасці”, - цытует Вардамацкага “Наша ніва”.

Падае і давер да Расіі, як да братняй дзяржавы. Вырасла колькасць тых, хто лічыць, што Расія можа распачаць у адносінах да Беларусі дзеянні, аналагічныя дзеянням адносна Украіны.

Вардамацкі таксама адзначае падзенне прарасійскіх арыентацый і пад’ём праеўрапейскіх. Прычынамі гэтага ён называе беларуска-расійскія гандлёвыя войны, інфармацыю з Украіны і ўжо відавочную міжнародную ізаляцыю Расіі.

"Гэты працэс насіў у папярэднія месяцы назапашвальны характар. Дынаміку як прарвала менавіта да лістапада. Аднак — і мы заўсёды гэта падкрэсліваем — пабачым далейшае развіццё. Пра што ідзе гаворка — пра звычайныя флуктуацыі ці генеральны кірунак — пакажуць толькі трэнды наступных рэгулярных вымярэнняў", — сказаў ён.