Рэжысёра Вольгу Мікалайчык за акцыю ва ўгодкі Плошчы-2010 аштрафавалі на 2 мільёны

Калі Вольгу Мікалайчык раніцай прывезлі з Маскоўскага РУУСа ў суд, высветлілася, што згубіўся пратакол. Паседжанне перанеслі на 14-ю гадзіну. Пратакол так і не знайшлі, таму склалі новы. Вольга яго не падпісала, бо, на яе думку, там было шмат нестыковак: сцяг быў названы бела-чырвоным, паводле дакумента, у 21:03 паступіў сігнал у міліцыю пра несанкцыянаваны пікет, а ў пратаколе напісана, што затрымалі Вольгу ў 20:30. Сведкі з боку міліцыянтаў у Маскоўскі суд так і не з'явіліся, піша Радыё Свабода.

Тым не менш, а 17-й гадзіне суддзя Тацяна Мотыль пачала разгляд справы. Дзякуючы адвакату, некаторыя нестыкоўкі ўдалося зняць. Прыкладна паўгадзіны доўжылася паседжанне. У выніку суддзя аштрафавала Вольгу Мікалайчык на 2 мільёны рублёў.

Вольга Мікалайчык была затрыманая ўвечары 19 снежня каля Чырвонага касцёлу, дзе ладзілася акцыя памяці падзей 19 снежня 2010 году.