Сёння ў Мінску ладзяць фестываль беларускай культуры "Дзень вышыванкі"

Сёння, 13 снежня, з 15.00 да 22.00 у холе Палаца мастацтва будзе працаваць кірмаш традыцыйных і сучасных вышыванак, адзення і сувэніраў ад папулярных моладзевых брэндаў, разнастайных вырабаў рамеснікаў і майстроў, а ў гэты час у канферэнц-залі будуць праходзіць майстар-класы, конкурсы, прэзентацыі ды музычныя выступы беларускіх гуртоў, паведамляе "Радыё Свабода".

Уваход на мерапрыемства вольны. Праграма фестывалю «Дзень вышыванкі» складаецца з трох частак, якія будуць адбывацца паралельна:

- адукацыйная:

- прэзентацыя па гісторыі і тэхналогіі вырабу вышыванкі;
- майстар-класы па ткацтву, выцінанцы ды іншых народных рамёствах;
- лекцыі па этнаграфіі, народным і сучасным мастацтве;

- забаўляльная:

- зона беларускіх настольных гульняў;
- нацыянальныя бодзі-арт і тату;
- раздача стужак з беларускім арнаментам;
- шматлікія конкурсы і падарункі;
- музычны канцэрт беларускіх гуртоў;
- іншыя цікавосткі.

- кірмаш:

- будуць прадстаўленыя вышыванкі, вопратка і адзенне з народным арнаментам, упрыгожванні і сувеніры з нацыянальным каларытам ад беларускіх вытворцаў.

Арганізатары чакаюць прапановы ад майстроў, профільных спэцыялістаў, этнографаў, ткачоў, рамеснікаў, гуртоў, музыкаў ды іншых для напаўнення праграмы адукацыйнай і забаўляльнай частак на электронны адрас [email protected] ці па нумары +375297828881.

Для ўдзелу ў кірмашы на «Дні вышыванкі» запрашаюцца вытворцы вышыванак, беларускай вопраткі і адзення, упрыгожванняў і сувеніраў з нацыянальнай беларускай адметнасцю.