КДБ цікавіцца фітнэс-праграмай Сяргея Міхалка

Як паведамляе прэс-служба гурта, у фітнэс-клубе супрацоўнікі КДБ цікавіліся, ці ёсць з Сяргеем Міхалком ахова, хто з ім трэніруецца, па якіх днях праходзяць заняткі, якія мэтады трэніровак практыкуюцца. Таксама цікавіліся, ці можна прыйсці і паназіраць за трэніроўкай.

Кіраўніцтва фітнэс-клуба, назва якога не называецца, адказала, што не мае права дзяліцца інфармацыяй пра сваіх кліентаў. Гурт BRUTTO адзначае, што такая цікавасць выклікае пытанні: “Мы не выключаем, што афіцэры цікавяцца працэсам трэніровак з асабістых меркаванняў, хочуць выведаць сістэму заняткаў, каб выглядаць гэтак жа прыгожа і спартыўна. Ніякага сакрэту тут няма: рэгулярная фізічная нагрузка, крос-фіт, прабежкі і бокс. Мы прапагандуем ў сваіх песнях сяброўства, працу, спорт, актыўную жыццёвую пазіцыю і іншыя агульначалавечыя каштоўнасці".

У прэс-службе КДБ каментаваць візіты супрацоўнікаў у фітнэс-клуб адмовіліся, паведамляе “Радыё “Свабода”.