У Мінску раздаюць стужкі з беларускім арнаментам. Ёсць затрыманыя арганізатары акцыі

У суботу 6 снежня стартуе акцыя "Пазнач сябе беларусам". У Мінску прыкладна 100 валанцёраў "Арт Сядзібы" падчас першага этапу акцыі раздадуць 5 000 метраў стужкі з беларускім арнаментам.

Як паведамляе "Радыё Свабода", актывістаў, якія раздавалі стужкі, затрымалі. Затрыманы таксама журналіст Уладзь Грыдзін, які фатаграфаў акцыю. Іх павезлі ў пастарунак на Якуба Коласа, 3.

Стужку можна атрымаць у шэрагу стацыянарных і мабільных кропак Мінска. Арганізатары акцыі заклікаюць запосціць свой фатаздымак са стужкай ў сацыяльныя сеткі з хэштэгам #беларускаястужка. Лепшыя фотаздымкі трапяць на сайт "Арт Сядзібы", а іх аўтары атрымаюць прыемныя падарункі.

"Каб кампанія "Беларуска ястужка" стартавала ўдала, а акцыя 6 снежня "Пазнач сябе беларусам" прайшла маштабна, патрэбная кансалідацыя грамадства, стварэнне вялікай каманды і дапамога кожнага неабыякавага беларуса", - адзначаюць арганізатары. 

Акцыя "Пазнач сябе беларусам" ёсць пэўным супрацьпастаўленнем распаўсюду ў Беларусі георгіеўскіх стужак і сцяжкоў Расіі.