Шведскія праваабаронцы заклікалі свой урад падтрымаць Алену Танкачову

Паводле лідэра Östgruppen Марціна Углы,кіраўніца замежнапалітычнага ведамства Маргот Вальстром гэтымі днямі заявіла ў парламенце, што беларуская палітыка Швецыі павінна заняць дакладную пазіцыю што да пытанняў дэмакратыі і правоў чалавека, уключна з ужываннем санкцыяў. Цяпер яна можа прадэманстраваць, наколькі сур’ёзныя былі гэтыя словы. Спадарыня Вальстром павінна публічна выказаць сваю адназначную падтрымку Алене Танкачовай, а таксама актыўна працаваць у кірунку таго, каб уключыць адказных за рашэнне аб дэпартацыі ў спіс тых чыноўнікаў, супраць якіх дзейнічаюць санкцыі ЕС.

У заяве швецкіх праваабаронцаў адзначаецца, што перавышэнне хуткасьці на дарогах пры кіраванні аўтатранспартам, у чым фармальна абвінавачваюць маючую расейскі пашпарт кіраўніцу мiнскага Фонду прававой трансфармацыi Lawtrend Алену Танкачову, ніколі дагэтуль не служыла падставай, каб замежным грамадзянам адмаўляліся працягнуць від на жыхарства, паведамляе Радыё Свабода. Прадстаўнікі Östgruppen лічаць, што рашэнне аб скасаванні віду на жыхарства і высылцы — палітычна матываванае.

«Відавочна, што Танкачова пакараная за сваю праваабарончую працу. Рэжым проста спрабуе прыбраць перад прэзідэнцкімі выбарамі ў наступным годзе сваіх апанентаў», — кажа Марцін Угла. На яго думку, вельмі важна, каб Швецыя і ЕС выказалі сваё стаўленне адносна такіх дзеянняў Мінску.