Пад Баранавічамі тонамі знішчалі рыбу (відэа)

Вадасховішча Мышанка - месца адпачынку жыхароў Баранавічаў, дзе можна і выкупацца, і рыбу палавіць. Можна... было. Як сапсавалася старая дамба, мясцовыя ўлады вырашылі асушыць вадасховішча. А мясцовым дазволілі напаследак палавіць рыбы. Лоўля хутка ператварылася ў масавае знішчэнне.

"Так бяздзейнічае баранавіцкі БООР - Таварыства паляўнічых і рыбаловаў. На возеры каля 200 чалавек, каторыя падсакамі і жывадзёрамі вылоўліваюць рыбу", - расказаў Белсату мясцовы жыхар.

Лавіць рыбу ў каламутнай вадзе на Мышанку прыбеглі не беспрацоўныя і бяздомнікі - прыехалі людзі на машынах. Рыбе проста не далі шансаў, перагарадзіўшы спалучэнне з ракой мяхамі і камянямі. Апроч звычайных вудзільшчыкаў у бруд палезлі людзі з баграмі і сеткамі. Міліцыя назірала, каб рыбакі не біліся між сабой за рыбу. А біць рыбу можна было ў неабмежаванай колькасці.

Эколаг Рыгор Фёдараў падобныя дзеянні называе непасрэдным парушэннем законаў:

"Закон аб жывёльным свеце абавязвае прымаць меры да таго, каб не разбураліся экасістэмы і каб не знішчалі жывёлаў, у тым ліку рыбаў".