Палітвязень Парфянкоў: Сцены мокрыя, кладуся спаць у адзежы

Пятро Парфянкоў пераказаў ліст сына: «Прыслаў вось апошні ліст. Прасіў газет, крыжаванак. Напісаў, што сядзіць у камеры адзін, сцены мокрыя, спаць даводзіцца не распранаючыся — і ўсё роўна холадна. Ну, што зробіш — сам вінаваты».

Ужо некалькі месяцаў Васіль Парфянкоў даседжвае свой тэрмін у адзіночнай камэры. На волю палітвязень мусіць выйсьці 5 снежня. Бацьку ў лісце ён напісаў гэтак: «Да хуткай сустрэчы за плотам!»

Трымаюць палітвязня ў калоніі ў Горках, нагадвае «Радыё Свабода». Васіль Парфянкоў асуджаны на год зняволення за парушэнне умоў прэвентыўнага нагляду, які за ім усталявалі пасля затрыманняў на акцыях салідарнасці з палітвязнямі.